ಫೈಸಲಾಬಾದ್‌: ಚಾಂಪಿಯನ್ಸ್‌ ಕಪ್‌ ಒನ್‌ ಡೇ ಕ್ರಿಕೆಟ್‌ ಟೂರ್ನಿಯಲ್ಲಿ ಅಪರೂಪದ ಶತಕ ಸಿಡಿಸುವ ಮೂಲಕ ಬಾಬರ್‌ ಆಝಂ ಹೊಸ ದಾಖಲೆ ಬರೆದಿದ್ದಾರೆ. ಈ ಮೂಲಕ ಟೀಂ ಇಂಡಿಯಾದ ಮಾಜಿ ನಾಯಕ ವಿರಾಟ್‌ ಕೊಹ್ಲಿ ಮಾಡಿದ್ದ ದಾಖಲೆಯನ್ನು ಪಾಕ್‌ ಆಟಗಾರ ಮುರಿದಿದ್ದಾರೆ.
ಪಾಕಿಸ್ತಾನದ ಫೈಸಲಾಬಾದ್‌ನಲ್ಲಿ ನಡೆಯುತ್ತಿರುವ ಚಾಂಪಿಯನ್ಸ್‌ ಒನ್‌ ಡೇ ಕಪ್‌ನ 7ನೇ ಪಂದ್ಯದಲ್ಲಿ ಡಲ್ಫಿನ್ಸ್‌ ತಂಡಗಳು ಮುಖಾಮುಖಿಯಾಗಿದ್ದವು. ಈ ಪಂದ್ಯದಲ್ಲಿ ಟಾಸ್‌ ಗೆದ್ದ ಸ್ಟಾಲಿನ್ಸ್‌ ತಂಡದ ನಾಯಕ ಮೊಹಮ್ಮದ್‌ ಹ್ಯಾರಿಸ್‌, ಬ್ಯಾಟಿಂಗ್‌ ಆಯ್ದುಕೊಂಡರು. ಅದರಂತೆ ಇನ್ನಿಂಗ್ಸ್‌ ಶುರು ಮಾಡಿದ ಶಾನ್‌ ಮಸೂದ್‌ 34 ರನ್‌ ಬಾರಿಸಿದರು. ಜೊತೆಗೆ ಯಾಸಿರ್‌ ಖಾನ್‌ 46 ರನ್‌ಗಳ ಉತ್ತಮ ಆರಂಭ ಒದಗಿಸಿಕೊಟ್ಟರು. ಇನ್ನು ಮೂರನೇ ಕ್ರಮಾಂಕದಲ್ಲಿ ಕ್ರೀಸ್‌ಗಿಳಿದ ಪಾಕಿಸ್ತಾನ ತಂಡದ ನಾಯಕ ಬಾಬರ್‌ ಆಝಂ, ಎಚ್ಚರಿಕೆಯ ಬ್ಯಾಟಿಂಗ್‌ನೊಂದಿಗೆ ತಮ್ಮ ಉತ್ತಮ ಇನ್ನಿಂಗ್ಸ್‌ ಕಟ್ಟಿದರು.
ಆಕರ್ಷಕ ಹೊಡೆತಗಳೊಂದಿಗೆ ಬ್ಯಾಟಿಂಗ್ ಆರಂಭಿಸಿದ ಬಾಬರ್‌, 100 ಎಸೆತಗಳನ್ನು ಎದುರಿಸಿ 3 ಸಿಕ್ಸ್‌ ಹಾಗೂ 7 ಫೋರ್‌ಗಳೊಂದಿಗೆ 104 ರನ್‌ಗಳ ಸ್ಫೋಟಕ ಶತಕ ಸಿಡಿಸುವ ಮೂಲಕ ಎಲ್ಲರ ಗಮನ ಸೆಳೆದರು. ಅಷ್ಟೇ ಅಲ್ಲದೆ, ಕಳೆದ ಕೆಲ ತಿಂಗಳಿಂದ ಕಳಪೆ ಫಾರ್ಮ್‌ನಲ್ಲಿದ್ದ ಪಾಕ್‌ ನಾಯಕ ಬಾಬರ್‌, ಈ ಎಚ್ಚರಿಕೆಯ ಸೆಂಚುರಿ ಬಾರಿಸಿ ಮತ್ತೆ ಲಯ ಕಂಡುಕೊಳ್ಳುವಲ್ಲಿ ಯಶಸ್ವಿಯಾದರು. ಹಾಗೆ ಈ ಶತಕದೊಂದಿಗೆ ಬಾಬರ್‌ ಅಝಂ, ವಿರಾಟ್‌ ಕೊಹ್ಲಿ ಹೆಸರಲ್ಲಿದ್ದ ಲೀಸ್ಟ್‌ ಎ ದಾಖಲೆಯನ್ನು ಸಹ ಮುರಿದರು.
ಲೀಸ್ಟ್‌ ಎ ಕ್ರಿಕೆಟ್‌  ದಾಖಲೆಯ ವಿಶೇಷವೇನು? 
ಲೀಸ್ಟ್ ಎ ಕ್ರಿಕೆಟ್ನಲ್ಲಿ ಅತೀ ಕಡಿಮೆ ಅಂದರೆ 199 ಇನಿಂಗ್ಸ್ಗಳಲ್ಲಿ 30 ಶತಕಗಳನ್ನು ಬಾರಿಸುವ ಮೂಲಕ ವಿರಾಟ್ ಕೊಹ್ಲಿ ವಿಶ್ವದ ಏಕೈಕ ಬ್ಯಾಟರ್ ಎನಿಸಿಕೊಂಡಿದ್ದರು. ಆದರೆ, ಇದೀಗ ಈ ದಾಖಲೆಯನ್ನು ಮುರಿಯುವಲ್ಲಿ ಬಾಬರ್ ಅಝಂ ಯಶಸ್ವಿಯಾಗಿದ್ದಾರೆ. ಬಾಬರ್‌ ಲೀಸ್ಟ್ ಎ ಕ್ರಿಕೆಟ್ನಲ್ಲಿ ಕೇವಲ 180 ಇನಿಂಗ್ಸ್ಗಳ ಮೂಲಕ 30 ಶತಕ ಪೂರೈಸಿದ್ದಾರೆ. ಈ ಮೂಲಕ ಕಿಂಗ್ ಕೊಹ್ಲಿ ಹೆಸರಿನಲ್ಲಿದ್ದ ಅಪರೂಪದ ದಾಖಲೆಯನ್ನು ತಮ್ಮದಾಗಿಸಿಕೊಳ್ಳುವಲ್ಲಿ ಯಶಸ್ವಿಯಾದರು. ಅಲ್ಲದೆ, 200 ಕ್ಕಿಂತ ಕಡಿಮೆ ಇನಿಂಗ್ಸ್ಗಳಲ್ಲಿ ಲೀಸ್ಟ್ ಎ ಕ್ರಿಕೆಟ್ನಲ್ಲಿ 30 ಶತಕ ಬಾರಿಸಿದ ವಿಶ್ವದ 2ನೇ ಬ್ಯಾಟರ್ ಎನಿಸಿಕೊಂಡಿದ್ದಾರೆ.
ಇನ್ನು ಬಾಬರ್ ಅಝಂ ಅವರ ಶತಕದ ನೆರವಿನಿಂದ ಈ ಪಂದ್ಯದಲ್ಲಿ ಪಾಕಿಸ್ತಾನ ಸ್ಟಾಲಿನ್ಸ್ ತಂಡವು 50 ಓವರ್ಗಳಲ್ಲಿ 7 ವಿಕೆಟ್ ಕಳೆದುಕೊಂಡು, 271 ರನ್ ಕಲೆ ಹಾಕಿತು.ಈ ಸಾಧಾರಣ ಗುರಿಯನ್ನು ಬೆನ್ನತ್ತಿದ ಪಾಕಿಸ್ತಾನ ಡಾಲ್ಫಿನ್ಸ್ ತಂಡವು ಕೇವಲ 97 ರನ್ಗಳಿಗೆ ಆಲೌಟ್ ಆಯಿತು. ಈ ಮೂಲಕ ಸ್ಟಾಲಿನ್ಸ್ ತಂಡ 174 ರನ್ಗಳ ಭರ್ಜರಿ ಜಯ ಸಾಧಿಸಿತು.